Os ydych chi’n poeni llawer am eich cymuned, neu os oes rhywbeth rydych chi am ei newid, gallwch sefyll i gael eich ethol fel cynghorydd lleol.

Mae’n bwysig bod cynghorwyr mor amrywiol â’r bobl sy’n eu hethol. Mae hyn yn golygu bod angen i ni gael mwy o bobl ifanc, mwy o fenywod, mwy o bobl o gymunedau Pobl Ddu, Asiaidd a Lleiafrifoedd Ethnig, mwy o bobl anabl a mwy o bobl LGBTQ+ i sefyll mewn etholiad.

Wrth sefyll fel ymgeisydd, bydd angen i chi ddewis a ydych am sefyll dros blaid wleidyddol neu fel aelod annibynnol – mae hyn yn golygu nad ydych yn gysylltiedig â phlaid wleidyddol.

Os ydych am sefyll dros blaid wleidyddol, bydd angen i chi gysylltu â changen leol y blaid. Y rheswm am hyn yw y bydd y blaid a’i haelodau fel arfer yn dewis pwy all eu cynrychioli yn yr etholiadau lleol.

Os ydych am sefyll fel ymgeisydd annibynnol, mae’n well cael rhywfaint o gyngor gan wahanol sefydliadau, a all roi’r wybodaeth y bydd ei hangen arnoch. Mae gwefan Byddwch yn Gynghorydd. Sicrhewch Mai Chi yw’r Newid. yn rhoi gwybodaeth i chi am fod yn gynghorydd a sut i ddod yn gynghorydd.

Mae’r Comisiwn Etholiadol yn darparu gwybodaeth bwysig am sefyll yn yr etholiadau lleol. Mae hyn yn cynnwys sut i lenwi’r papurau enwebu y bydd angen i chi eu hanfon i sefyll mewn etholiad.

Gall eich cyngor lleol roi cyngor a gwybodaeth ynglŷn â sefyll mewn etholiad. Gallech hefyd gysylltu â’ch cynghorwyr presennol, a all ddweud wrthych sut beth yw bod yn gynghorydd a beth fydd angen i chi ei wneud.

Bydd angen i chi anfon eich ffurflenni enwebu erbyn 4yh ar 5ed Ebrill i sefyll etholiad fel cynghorydd lleol