Cynhelir etholiadau llywodraeth leol pob pedair blynedd fel arfer. Mae’r gymuned yn pleidleisio dros gynghorydd i’w chynrychioli am dymor o bedair blynedd – mae hyn yn golygu y bydd rhywun yn gynghorydd am bedair blynedd. Gallai etholiad lleol ddigwydd yn gynt os bydd cynghorydd yn rhoi’r gorau i’w sedd a bod angen ei llenwi, er enghraifft.

Eleni, caniateir i awdurdodau lleol ddewis pa system bleidleisio y mae’n ei defnyddio i ethol ei chynghorwyr. Gall hyn fod naill ai’n Gyntaf i’r Felin, neu’r Bleidlais Sengl Drosglwyddadwy.

Pan ddefnyddir y system Cyntaf i’r Felin, bydd ymgeisydd yn ennill os yw’n cael y nifer uchaf o bleidleisiau. Dyna sut y caiff ASau eu hethol mewn Etholiadau Cyffredinol ar gyfer Senedd y DU.

Dan system Pleidlais Sengl Drosglwyddadwy, mae pleidleiswyr yn rancio rhestr o ymgeiswyr yn nhrefn eu dewis – gyda’u ffefryn fel rhif un, eu hail ffefryn fel rhif dau, ac yn y blaen. Math o gynrychiolaeth gyfrannol yw hwn ac mae’n golygu y bydd y canlyniadau’n adlewyrchu lleisiau pawb a bleidleisiodd – nid lleisiau pobl a bleidleisiodd dros yr ymgeisydd buddugol yn unig.